Голд машинаа угааж байсан 2 иргэний нэг нь живж, амь насаа алджээ

Өчигдөр буюу долоодугаар сарын 24-ны өдөр Хөвсгөл аймгийн Онцгой байдлын газарт автомашинаа угааж байсан иргэн живсэн тухай дуудлага ирүүлжээ. 

Хөвсгөл аймгийн Мөрөн сумын Урандөш багийн “Цагаан-Эрэг” гэдэг газар Дэлгэр мөрөн голд “Сонато-7” загварын суудлын автомашин угааж байсан хоёр хүнээс тус аймгийн Арбулаг сумын харьяат иргэн Б живсэн тухай дуудлагыг аврагчид өчигдөр 18:40 цагт хүлээн авсан байна. Тус газар нь аймгийн төвөөс баруун зүгт 6 км-т зайд байдаг байна.

Дуудлагын дагуу тус аймгийн Онцгой байдлын газрын алба хаагч, 2 автомашин, 1 завьтай 6 км зам туулан 19:01 цагт очиж эрэн хайх ажиллагааг зохион байгуулж 3-4 метрийн гүнд 5 удаа шумбалт хийж үр дүнд хүрээгүй тул 21:02 цагт аврах ажиллагааг түр зогсоосон байна. Улмаар өнөөдөр өглөөний 08:00 цагт эрэн хайх ажиллагааг эхлүүлж осолдсон газраас зүүн зүгт 3 км тус багийн “Улаан байшин” гэдэг газраас 08:22 цагт цогцсыг олж уснаас гарган Цагдаагийн байгууллагад шилжүүлэн өгсөн тухай Онцгой Байдлын Ерөнхий газар мэдээллээ.