Судалгаа: 18-25 насны эрэгтэйчүүдийн 45 хувь нь эмэгтэй хүнтэй нүүр тулж болзоонд урьж байгаагүй

Z үеийнхний хувьд танихгүй хүмүүстэй нүүр тулж харилцаа үүсгэн, болзоонд урих явдал буурчээ. “DatePsychology” сайтын хийсэн судалгаагаар 18-25 насны эрэгтэйчүүдийн 45 хувь нь эмэгтэй хүнийг биечлэн болзоонд урьж байгаагүй гэх тоо баримт гарсан юм. Үүний оронд ихэнх болзоог аппликейшн болон хувийн чат зэрэг цахим байдлаар товлох болжээ.

Тус судалгаагаар бол нийгмээс сэтгэл түгших байдал, татгалзсан хариу авахаас айх болон харилцан яриа өрнүүлэхэд дэлгэцээс хамааралтай байдал нэмэгдсэн нь үүний шалтгаан болж байгаа аж. Эрдэмтэд “Хүмүүс цахим харилцааг энгийн харилцааны хэлбэр гэж үздэг болсон. Үүний улмаас бодит ертөнц дээрх нийгмийн ур чадвараа хүмүүс тийм ч их хөгжүүлэхээ больсон учир нүүр тулж харилцах үед нийгмээс сэтгэл түгших асуудал нэмэгдсэн байна” гэжээ.

Бусад судалгаанууд ч гэсэн залуус болзож, үерхлийн харилцаа эхлүүлэхийг хойш тавих болсныг харуулдаг. Үүний шалтгаанд сэтгэл зүйн эрүүл мэндийн бэрхшээл, карьерын дарамт, цар тахлын дараа нийгмээс залхсан явдал гэх мэт зүйлс багтаж буй.

Эх сурвалж: Relevant Magazine