ДРОН ТЕХНОЛОГИЙН ТАЛААРХИ “ENTERPRISE DRONE” АРГА ХЭМЖЭЭ АМЖИЛТТАЙ БОЛЛОО

“Enterprise Drone” буюу тусгай зориулалтын дроны технологийн хөгжлийн чиг хандлага, ач холбогдол, хэрэглээ, боломжуудыг танилцуулах арга хэмжээ боллоо.

Сүүлийн 10 гаруй жилд үсрэнгүй хөгжсөн технологийн жишээ бол хүнгүй нисэх төхөөрөмжийн нэгэн төрөл болох “Дрон” гэдэгтэй хэн ч маргахгүй. Дроныг бид саяхан зураг дарж, бичлэг хийх зориулалттай хэрэгсэл мэтээр хүлээн авдаг байсан бол тус технологийн хэрэглээ асар хурдацтайгаар өсөн нэмэгджээ. Үйлдвэрлэлийн тоо хэмжээ болон дрон технологийн үр ашигтай байдал сайжирснаар дэлхийн улс орны төрийн болон бизнесийн байгууллагууд, энгийн хэрэглэгчдийн тус технологид оруулах хөрөнгө оруулалт өсөн нэмэгдсээр ирсэн бөгөөд цаашид ч өсөх хандлагатай байна. Дроныг анх мэйл хүргэх, зураг дарах зэргээр ашигладаг байсан бол өнөөдөр барилгын 3D зураг боловсруулах, онцгой байдал, гал унтраах, хөрсний бүтэц тодорхойлох, кино үйлдвэрлэл, дэд бүтцийн хяналт шалгалт, ашигт малтмалын хайгуул, хилийн хяналт гэх мэтчилэн маш олон салбарт төрөл бүрээр ашиглах боломжтой болжээ.


Дрон технологийн хэрэглээний боломжууд асар хурдацтайгаар өсөн нэмэгдэж байгаа энэ цаг хугацаанд DJI, Харилцаа холбоо, Мэдээллийн технологийн газар, Мэдээлэл, технологийн үндэсний парк, Хоббизоне ХХК-тай хамтран 2019 оны 2 сарын 20-ны өдөр “Enterprise Drone” арга хэмжээг зохион байгуулсан билээ. Тус арга хэмжээний зорилго нь “Төрийн болон бизнесийн байгууллагууд тусгай зориулалтын дроны шийдлүүдийг өөрсдийн үйл ажиллагаанд хэрхэн үр өгөөжтэй нэвтрүүлэх боломж”-ийг бодит жишээнүүдэд тулгуурлан танилцуулах, цаашид тус шийдлүүдийг хэрхэн нэвтрүүлэх талаар санал, туршлага солилцоход оршино. Монголд анх удаа өргөн хүрээгээр зохион байгуулагдсан энэхүү арга хэмжээний үеэр дэлхийн шилдэг дрон үйлдвэрлэгч DJI компанийн байгууллагуудын хэрэгцээнд зориулсан шинэ дронуудыг танилцуулсан бөгөөд дараах ажлуудыг зохион байгууллаа.


МТҮП-ын захирал Ц.Содномдамба нь Аж үйлдвэрийн IV хувьсгалд Монголын төр, хувийн хэвшлүүд бодлогын болоод хүний нөөцийн хувьд бэлтгэгдэх, мэдлэгжих, бүтээлч ажиллах шаардлага тулгараад байгааг онцолсон бөгөөд өргөн уудам газар нутагтай, байгалийн эрс тэс уур амьсгалтай манайх шиг оронд цаг хугацаа, зардал өртөгийг бууруулж, үр дүнтэй, бүтээлчээр ажиллах боломжийг Дрон Технологи олгох болно, үүнийг бүтээлчээр, үр дүнтэй хэрэгжүүлэх нь чухал хэмээн уг арга хэмжээг зохион байгуулах ажлын хэсэгт чиглэл болгон онцолж, энэ чиглэлээр практик, жишээтэйгээр танилцуулж, хүрэлцэн ирсэн, оролцож байгаа хүмүүст олон талт мэдээлэл өгхийг хүссэн юм.

Дрон Технологийн Аваргуудын нэг DJI -ийн Монгол дахь төлөөлөгч компани Хоббизоне ХХК-ын үүсгэн байгуулагч Э.Энхбаяр болон уг компанийн гүйцэтгэх захирал Г.Төгөлдөр уг арга хэмжээг санаачлан хамтран зохион байгуулж байгаа төр, хувийн хэвшлийнхэнд талархаад Дрон Технологийн талаарх сүүлийн үеийн танилцуулгыг оролцож байгаа хүмүүст хүргэсэн нь цаг үеэ олсон, сонирхолтой танилцуулга байлаа.


Манай улсад дрон нь эрэл хайгуул явуулахад хүмүүсийн хөдөлмөрийг хөнгөвчилж буй талаар ОБЕГ-ын Гамшгийн шуурхай удирдлагын газрын дарга Б.Мандахгэрэл онцлон хэлсэн. Тэрбээр “Гамшгаас хамгаалах үйл ажиллагаанд шинжлэх ухаан технологийн ололт, инноваци нэвтрүүлэхэд онцгой байдлын газар сүүлийн жилүүдэд идэвхтэй ажиллаж байна. Аврах ажиллагаанд хүн хүчнээс гадна технологийн ололтыг өргөнөөр ашиглах цаг ирсэн. Тухайлбал, дроныг ашигласнаар ой хээрийн түймрийн тархалтыг тогтоох, хүн хүчээ хувиарлах, удирдлагын шийдвэр гаргах түвшинд ажиллаж чадаж буй явдал юм. Өнөөдрийн байдлаар манай улсын онцгой байдлын газар 20 орчим дроныг ашиглаж байна. Хамгийн том давуу тал нь цаг хугацаа, хүн хүч хэмнэх явдал тул эрэн хайж, аврах ажиллагаанд чухал үүрэг гүйцэтгэж байгаа юм” гэв.

АНУ-ын байгууллагууд үйл ажиллагаандаа дроныг нэвтрүүлэх нь сүүлийн 2 жил 552 дахин өсжээ. Мөн АНУ-ын хууль сахиулах байгууллагын мэргэжилтнүүд 2025 он гэхэд 20,000 дроныг жил бүр ашиглалтад оруулан үйл ажиллагаандаа ашиглах тооцооллыг гаргажээ.

Дроны үүсэл хөгжил, ашиглалтын талаар “Hobby zone” ХХК-ийн гүйцэтгэх захирал Г.Төгөлдөр хэлэхдээ “Дроны үүсэл хөгжлийг харвал 1800 оноос гаралтай. Харин өнөөдөр аж үйлдвэрийн салбар бүрт ашиглагдаж буй дроны хөгжил нь 2009 оноос эхэлсэн. Үндсэндээ нийт 10 жилийн хугацаанд дрон технологи үсрэнгүй хөгжсөн байна. Аж үйлдвэрийн дөрөвдүгээр хувьсгалд ашиглагдах үсрэнгүй технологи нь дрон технологи байх ёстой бөгөөд бүх салбар ашиглах боломжтой болсон. Түүнчлэн хүний амь нас эрсдэх аюултай ажиллагаанд хүртэл дроныг явуулах боломжтой болсон байна. Үйл ажиллагаагаа зохион байгуулахаас өмнө төрийн байгууллагуудаас судалгаа авахад одоо нийтлэг болж эхэлж байгаа нь харагдсан. Бид дэлхийн дрон технологийн хөгжлөөс хоцроогүй харин ч мөр зэрэгцээд явж байна” хэмээн онцоллоо .



http://new.itpark.mn/a/4d2?fbclid=IwAR3DTv5pHqvjA8HUy8yw404jiOInOO5i9zuDSaxB9h3_vX0XSjv9sXRZXJA