Хүндийг өргөлтийн тамирчдыг дасгалжуулагч нь дарамталж допинг хэрэглүүлж байсан гэв үү

Монголын хүндийг өргөлтийн тамирчдын амжилт хурдацтай ахиж дэлхийн аварга шалгаруулах тэмцээнээс медаль хүртээд байгаа. Гэсэн ч хүндийг өргөлтийн шигшээ багийн тамирчдын талаар таагүй мэдээлэл цацагдаж эхэллээ.

Үндэсний шигшээ багийн ахлах дасгалжуулагч Ц.Хосбаяр тамирчдаа дарамталж олон улсад хориглодог допингийн төрлийн бодис хэрэглүүлсэн байж болзошгүй гэх мэдээлэл гараад байгаа юм. Энэ талаар дасгалжуулагч Ц.Хосбаярын шавь нар нь гомдол гаргажээ. Тэрбээр оксандралоне, энантат, пропинат зэрэг бодисыг шавь нартаа хэрэглүүлдэг байсан талаар тамирчид нь гомдол мэдүүлсэн байна. Тус хориотой бодисыг хэрэглэсэн тамирчны биеийн байдал муудаж мэс ажилбарт оржээ. Улмаар дотор эрхтний үйл ажиллагаанд нь доголдол үүсч, хэд хэд хэдэн мэс ажилбарт орсон гэнэ. Хохирогчийн ээж энэ талаар Монголын хүндийг өргөлтийн холбоонд гомдол гаргахад авч хэлэлцээгүй байна. Энэ мэтчилэн 2012-2016 оны олимпийн мөчлөгт шигшээ багт хичээллэж байсан хэд хэдэн эмэгтэй тамирчид эрүүл мэндээрээ хохирсон гэнэ. Оксандралоне, энантат, пропинат зэрэг бодисыг хэрэглэсэн тохиолдолд тамирчдын элэг, бөөрний үйл ажиллагаа доголдож, ходоод цоорох эрсдэлтэй байдаг аж.

Үндэсний шигшээ багийн дасгалжуулагч Ц.Хосбаяр олон улсын тэмцээний үеэр шавийгаа допингийн шинжилгээнд хамрагдахад оронд нь өөр тамирчин оруулсан зөрчил гаргасан гаргажээ. Харамсалтай нь шинжилгээнд хамрагдсан тамирчнаас нь нистерлон гэх допингийн төрлийн бодис илэрч олон улсын тэмцээнд оролцох эрхээ дөрвөн жилээр хасуулсан байна. Тэрбээр энэ бүх үйлдэлдээ хариуцлага хүлээж өнгөрсөн оны дөрөвдүгээр сард үндэсний шигшээ багийн дасгалжуулагчийн албанаас чөлөөлөгдөх өргөдлөө хүргүүлсэн байна. Харин түүний ажлыг хүү нь болох Х.Одхүү авч шигшээ багийн дасгалжуулагчаар ажиллаж байгаа аж.

Мөн дасгалжуулагч Ц.Хосбаяр АНУ-д болсон тэмцээнээс буцахдаа конторвантын хэрэгт холбогдон их хэмжээний эм тариаг хилээр нэвтрүүлэхийг завдсан ажээ. Тус хэргийг Улсын мөрдөн байцаах газар шалгаж байгаа аж.

Сонирхуулахад 2016 оны олимпийн наадамд манай улсыг төлөөлж оролцсон олон улсын хэмжээний мастер Ө.Чагнаадоржийн допингийн шинжилгээнээс тестостерон гэх бодис илэрч эрхээ хасуулж байсан билээ.